Bezibomvu ligazi iimpahla nenyawo zabahlali abadutyulwe kuqhankqalazo lokungabikho kwamanzi eBhofolo izolo, umhla weshumi elinesibhozo kule imiyo.
Abahlali bachithachithwe ngeembumbulu zerabha nangezintywizisi emva kokuvala uhola wendlela ophakathi kwebhofolo neDike ngamadangatya amatayera kwakunye nendlela eya eCape College.
“Thina besizincokolela simi ecaleni kwendlela sava ngezithonga zeembumbulu ebezijoliswe kuthi”
La ngamazwi womhlali obephuma esibhedlele nongomnye wamakhosikazi amathathu athe adutyulwa koludushe obeluphakathi kwamapolisa nabahlali.
Ukanti nomfana obethe waquleka emva kokutsarhwa zizintyizisi uphume esibhedlele ebonakala engcono kakhulu emva kokufakwa kumatshini ophefumlisa ngombane.
Kudliwano-ndlebe neliphepha-ndaba abahlali bathe sekulixesha elingangeveki ezimbini bengenamanzi.
Ukanti kwezinye iindawo ezifana naseMagaleni naseTyoks bathi sele ingunyaka.
Abahlali bayicacise mhlophe into yokuba zininzi iziseko ezingundoqo ezichaphazelekileyo nezinto ezimileyo ngenxa yokungabikho kwamanzi kulangingqi kuquka izikolo, amasebe ezempilo, imisebenzi, kunye nasetilongweni.
Iindaba zihambisa zithi abanye abaqhankqalazi baye bayokuvalelwa eziseleni ngelithi bophula umthetho wobundlobongela esidlangalaleni lento kuthiwa yi public violence ngesiLungu.
Abahlali bathyola amapolisa ngokubakhupha ezindlini ezikufutshane ababalekele kuzo nokubasusa ezitalatweni ngembumbulu ngelithi mabachithakale nangona bebeluyekile udushe belinde iziphathamandla zaseAmathole.
“Asikwazi kuhamba apha engekafiki uSodolophu waseMatole, uAnele Ntsangani. “utshilo omnye wabahlali ongafunanga igama lakhe lithiwe paha.
Oludushe nemifanekiso yamaxhoba kuquka iimpahla zawo ebezibomvu ligazi zisikhumbuze iintsuku zobandlululo nalapho abantu ababesilwela amalungelo abo babexhatshazwa xabekhweliswa kwinqwelo zamapolisa bedutyulwa ngokungenalusini.
Ukanti eliphepha-ndaba likwaqaphele nemeko yobumdaka engaginyisi mathe ekwisibhedlele saseBofolo ebebencedwa kuso abahlali.
Ngexesha lokushicilela bezingekafiki iziphathamandla zaseMatole nezithyolwa ngokuvala iminxeba yazo.
Abahlali nabebevutha ngumsindo bathyola usodolophu waseRaymond Mhlaba, uNomhle Sango ngokungabahoyi ze babhenela kwinkulumbuso yePhondo, uOscar Mabuyane.
Eliphepha-ndaba liyokushicilela besajonge enkalweni phantsi kweliso elibukhali lamapolisa ebephuma eMonti, Cradock nakwezinye iidoluphu ezikufutshane esingazikhankanyanga.
Sithetha nawe nje luyaqhuba udushe nanamhlanje, abahlali bavathe iqaqa babetha ngenqindi phantsi bathi abayindawo bengenawo amanzi.
